nuacht

An Tairseach – Seoladh Oifigiúil

Tá COGG thar a bheith sásta a fhógairt go bhfuil An Tairseach seolta. Seoladh go hoifigiúil é in Amharclann Halla an Bhaile, Cathair na Mart ar an 22 Deireadh Fómhair.

Ceann de mhórspriocanna an Pholasaí don Oideachas Gaeltachta ná feabhas a chur ar sholáthar acmhainní agus tacaí teanga chun cuidiú le pleanáil scoile uile, teagasc, foghlaim agus measúnú i gcomhthéacsanna príomhshrutha agus RSO. Iarradh ar COGG i gcomhpháirt le heagraíochtaí eile acmhainn chuimsitheach, nuálach agus chruthaitheach ar líne a dhearadh chun freastal a dhéanamh ar riachtanais oideachais na scoileanna Gaeltachta agus na scoileanna lán-Ghaeilge chomh maith le tacú le múineadh na Gaeilge i scoileanna eile na tíre.

Forbraíodh an tairseach thiomnaithe seo ar líne, mar sin, chun raon leathan acmhainní ilmhódacha atá cruthaithe ag múinteoirí, agus a bhfuil cáilíocht dearbhaithe acu, a chur ar fáil do mhúinteoirí eile. Múinteoirí ag tacú lena chéile. Cuirfear leo agus déanfar athbhreithniú ar bhonn rialta orthu.

Ar fáil anseo – www.tairseachcogg.ie

Seachtain an Mhata

Léigí ár Nuachtlitir Speisialta le haghaidh Seachtain an Mhata 2024 (Bunscoileanna amháin). Ar fáil anseo.

Cosáin mata fíorúil, Tráth na gCeist ar Líne, Cluiche Idirghníomhach agus Comórtas Sluáin! Bainigí taitneamh as na gníomhaíochtaí!

Forbairt Ghairmiúil Leanúnach ar FCÁT

D’fhreastail múinteoirí iar-Bunscoile ó gach cearn den tír ar chúrsa FGL in FCÁT an tseachtain seo caite in Áth Luain. Bhí deis acu a Chleachtais a roinnt agus d’fhoghlaim siad faoi dhea-chleachtas sa tumoideachas. Gabhann COGG buíochas lenár gcomhpháirtithe ón ETBI agus le héascaitheoirí an chúrsa ó Ollscoil na Gaillimhe Breandán Mac Gearailt agus Sinéad Ní Ghuidhir. Is fiú óir í an fhoghlaim.

Cúrsa Gaeilge COGG faoi stiúir Ghaelchultúr

Tá COGG an-sásta a fhógairt go mbeidh ranganna Gaeilge á gcur ar fáil ar líne saor in aisce do mhúinteoirí iar-bhunscoile arís an téarma seo.

D’éirigh go hiontach leis na ranganna Gaeilge do mhúinteoirí na nIar-bhunscoileanna a reáchtálamar ar líne i gcomhar le Gaelchultúr san Fhómhar,le Dianchúrsa COGG a bhí ar siúl i mí Lúnasa agus le linn an dá théarma scoile anuraidh.

Cuirtear na ranganna ar fáil saor in aisce anois ach éarlais a íoc. Is gá do mhúinteoirí éarlais €50 a íoc agus má fhreastalaíonn an múinteoir ar 8 rang as 10, gheobhaidh siad aisíoc de €50. Má tá fíordheacracht ag aon scoil leis an éarlais seo agus más mian le múinteoirí na ranganna a dhéanamh is féidir teagmháil a dhéanamh linn go díreach agus beidh cabhair ar fáil.

Tabharfaidh na ranganna seo an-mhuinín do mhúinteoirí don teagasc trí Ghaeilge agus tacóidh siad leo barr feabhais a bhaint amach agus a bheith muiníneach sa seomra ranga trí Ghaeilge, agus leis na hacmhainní agus na háiseanna téarmaíochta Gaeilge don seomra ranga.

Cláraigh anseo.

Léitheoirí Líofa

Foilseachán Nua – Léitheoirí Líofa – Ag Cothú Toil agus Scil Léitheoireachta le Claire M. Dunne

Is téacs comhghabhálach é Léitheoirí Líofa do Scéalta den Scoth agus pléann sé le bunscileanna litearthachta a thacaíonn le léitheoirí cumasacha a chothú. Tá sé mar aidhm ag an leabhrán Léitheoirí Líofa an taighde naisiúnta agus idirnáisiúnta a tharraingt le chéile maidir le múineadh na léitheoireachta, mar aon leis na cosúlachtaí agus na difríochtaí idir múineadh léitheoireacht na Gaeilge agus múineadh léitheoireacht an Bhéarla. Tá béim ar chur chuige ilteangach ann freisin, ag teacht le Curaclam Teanga na Bunscoile (2019).

Leagan PDF ar fáil anseo.

Leabhrán ar líne ar fáil anseo.

An Cheathrú Ghaeltachta ag Higher Options

Tá COGG an-sásta filleadh ar Aonach na nGairmeacha, Higher Options, san RDS an tseachtain seo. Tugtar deis do scoláirí iar-bhunscoile ag an gCeathrú Ghaeltachta ann, eolas cuimsitheach a bhailiú ó institiúidí eagsúla faoin iliomad rogha staidéir agus deis gairme atá ar fáil dóibh le Gaeilge.

Tá leagan úrnua den phacáiste gairmeacha: Deiseanna Gairmeacha le Gaeilge, foilsithe agus ullamh ag COGG le cur faoi bhráid na scoláirí ag Higher Options mar aon le leagan Béarla de a foilsíodh i rith na bliana dar teideal Career Opportunities with Irish.

Dar le hAoife Ní Shéaghdha, Oifigeach Oideachais Iar-bhunscoile le COGG “Is foilsiúchán uasdátaithe é lán le heolas suas chun dáta ar roghanna staidéir agus oibre i réimsí gairme breise, ar nós ETIM, Na Taibhealaíona, Folláine agus Spóirt, nach raibh san áireamh sa chéad leagan. Tá eolas an-luachmhar agus praiticiúil sa phacáiste ar bhuntáiste na Gaeilge do scoláirí in aimsiú lóistín agus scoláireachtaí agus sparánachtaí tar éis a gcuid scolaíochta”.

Dar le hAoibhinn Ní Chraoibhinn, a bhuaigh Spáranacht don Ghaeilge, 2024 (Bord Oideachais agus Oiliúna, urraithe ag COGG) – gradam gurbh fhiú 5,000 euro, “is ionann teanga sa bhreis agus deis sa bhreis do dhaoine óga. Bhí an pacáiste seo thar a bheith úsáideach domsa anuraidh agus mé ag machnamh ar líonadh an CAO, bhí gach eolas faoi gach cúrsa bailithe in aon áit amháin agus cur síos ar réimsí oibre agus gairme a bhfuil an Ghaeilge mar bhuntáiste dóibh nach mbeinn tar éis cuimhneamh orthu, ar nós Tithe an Oireachtais, an tAontas Eorpach, Cúrsaí Gnó agus Spóirt”.

Nótaí don Eagarthóir: I measc na nAoichainteoirí i láthair ag an gCeathrú Ghaeltachta:

Páidí Ó Lionáird – Láithreoir, léachtóir, colúnaí, oifig an Choimisinéara Teanga
Sinéad Ní Uallacháin – Iriseoir, aisteoir, podchraoltóir,
Ruadhán Mac Cormaic – Eagarthóir an Irish Times

Leagan Gaeilge den phacáiste gairmeacha: https://online.fliphtml5.com/lfbld/bbzf/#p=1

Leagan Béarla den phacáiste gairmeacha: https://shorturl.at/SZmk6

Físeán Eolais: https://vimeo.com/1005858668?share=copy

Fiosruithe Meán: Bláthnaid Uí Fhátharta, Oifigeach Cumarsáide agus Margaíochta blathnaid@cogg.ie (087) 6336355

Forbairt Ghairmiúil Leanúnach ar FCÁT

Tá áthas orainn a fhógairt go bhfuil Ollscoil na Gaillimhe i gcomhar le Boird Oideachais agus Oiliúna Éireann (ETBI) agus an Chomhairle um Oideachas Gaeltachta agus Gaelscolaíochta (COGG) ag soláthar cúrsa forbairt ghairmiúil leanúnach sa FCÁT/dea-chleachtais an tumoideachais.

Cúrsa praiticiúil atá anseo a thagann leis an gcur chuige taighde-bhunaithe SIOF (Mac Gearailt et al. 2023).

Trí lá inseirbhíse a bheidh i gceist.

Lá 1 – Scafláil Teanga agus Ionchur Teanga 1

Lá 2 – Ionchur Teanga 2 agus Aischur Teanga

Lá 3 – Aiseolas Teanga, cur chuige ranna/scoile agus cur i láthair múinteoirí.

*Caithfidh múinteoirí a bheith ar fáil ar an trí lá le go mbronnfar an teastas rannpháirtíochta orthu.

Tabharfar Punann Mhachnaimh agus Phleanála (leagan crua) do gach múinteoir agus déanfar acmhainní a chur ar fáil go leictreonach.

Cúrsa gníomhach a bheidh anseo agus iarrfar ar mhúinteoirí acmhainní teagaisc is foghlama dá gcuid féin (pleananna, téacsleabhar, nótaí, taispeántais powerpoint srl.) a tabhairt leo chuig na laethanta éagsúla.

Beidh tascanna machnaimh agus pleanála le déanamh idir na laethana inseirbhíse.

Struchúr an lae: 10.00 – 15.30

Dátaí:

Lá 1: Déardaoin 3 Deireadh Fómhair 2024

Lá 2: Déardaoin 23 Eanáir 2025

Lá 3: Déardaoin 3 Aibreán 2025

Costas: Níl aon chostas ar an gcúrsa seo.

Ionad: Ionad fós le socrú. Tabharfar rogha ar an bhfoirm chlárúcháin (Gaillimh, Luimneach nó Atha Luain agus freastalófar ar an gcéad rogha)

Níos mó eolais anseo.